domingo, 13 de septiembre de 2009

Tapete Majiko


traigo kantikos olvidados
kansiones de amor i de sufrir
de los romanseros ladinos
kon las lyaves de el bivir.

traigo esfuenyos i rekodros
de el sonreír i de el yorar
ke en un tapete de loas
bolaron mas ayá de la mar.

ande el gemido de el tiempo
mira la sonriza de el viento
el klaro de la luna echizar

ande el baylar de las onduras
seduse las kantikas de amor
de la sirena de la mar.

                             Odmar Braga .·.

   

viernes, 14 de agosto de 2009

Oksilasion


                       
¿En ke senda,
en ke kamino,
en ke rastro
brota el biervo jerminado?

¿Sera, ke entre los brumozos atajos
de los desinyios de la lingua
i de el pensamiento
se eskulpieron a si mismas las estrofas?

¿O sera, ke en la nievla torsida
de las metaforas,
- kuyos ojos siguen mirando
el infinito -
es ande okultase la ansiedad
i las poezias?

                Odmar Braga .·.

                            

Me rekodro

El komboio de mi bida - Odmar Braga .·.

       Me rekodro


A mi presioza “Alegrica” Margalit Matitiahu,
mi kerida poetiza ermana de mi Sefarad.


א


¡Ah!... Sangre , Sangre
de mi sangre de Espanya
ke Sefarad en mi alma kanta,
Ke en mis versos palpitan
i a mi korasón estremerse.


ב


Me rekodro,
Si mi ermana me rekodro
de las konsejas de los avuelos,
Son kinyentos de los anyos i me rekodro
de los refranes de las kantikas,
De las kansiones la más antíka
i de el golor de los pasteles.


ג


Me rekodro ,
Si mi ermana me rekodro
del karinyo de muestros padres,
Son kinyentos de los anyos i me rekodro
de la guadra de muestra erensia,
De la tradision de los hahamim
ke disheron de la fidelidá de haShem
i de el luzero de la Torah.


ד


Me rekodro,
Si mi ermana me rekodro
de la notche de los tiempos,
Son kinyentos de los anyos i me rekodro
de la lágrima ke kemó,
De tinieblas sin la Luz
i de la sangre ke yoró.


ה


Me rekodro,
Si mi ermana me rekodro
del sufrimiento de los siglos,
Son kinyentos de los anyos i me rekodro
ke fuímos dezraygardos de Espanya,
Ke tenemos la fuerza de muestro espiritu,
Ke djudios solamente somos
i mos yamamos de mozotros.


ו


¡Ah!... Sangre, Sangre
de mi sangre de Espanya
ke Sefarad en mi alma kanta,
Ke en mis versos palpitan
i a mi korason estremerse.


                         Odmar Braga.·.